太古城冰場變波波池 每小時消毒

【明報專訊】太古城中心為咗配合最新形象，今個月13號至15號溜冰場會暫時變身色彩繽紛嘅大型「波波池」，當中分做成人池同小童池，有40厘米深，仲有一條長5米嘅滑梯，等一家大細都可以喺波波池一齊遊玩，每次池內最多可以容納80人。


九巴每日1:99漂白水清潔

不過，近期新SARS驚魂，唔少人都擔心玩波波池，因為病菌可能會由飛沫傳播。太古城中心發言人話，波波池每小時都會消毒，入場前公眾要除鞋同著襪，著埋大會提供嘅全新膠鞋套，仲要用酒精搓手液消毒雙手，同埋量體溫確保無發燒。大會仲話，現場會提供口罩，入口處會張貼衛生告示，提醒入場人士注意衛生。


除咗波波池，唔少市民都關注公共交通嘅環境。九巴話每日都會用1：99漂白水清潔車廂，而每部冷氣巴士都加裝電子空氣淨化器，可以吸走空氣中極微細嘅污糟嘢，仲可以隔除空氣中嘅細菌同病毒。九巴仲喺facebook抽一下，「暫時去唔到南韓，不如坐巴士去尖沙嘴食住韓烤頂住檔先啦！」