陳永棋爛腳痊癒 戒甜控糖尿

【明報專訊】廣東社團總會主席、全國政協常委陳永棋噚日開記招講政改民調結果，言談間爆自己早排入咗醫院18日。棋哥話，之前著短褲去打高爾夫球，點知傷口細菌感染，加上糖尿病影響，成隻左腳小腿都紅腫潰爛流膿。曾經去旅行畀雷劈中但大難不死嘅棋哥話，經過爛腳呢件事，「感受到生命嘅可愛」，為咗健康，家要戒甜。


棋哥強調，家已經好番99%，噚日Emily見棋哥都係健步如飛。棋哥話，自己嘅糖尿病指數已經「擲界」，但一直都呃自己無事，仲猛食甜品。點知4月底因為小腿傷口感染潰爛，佢話如果係遲一年發生，可能隻腳都無咗。


佢家會戒口，唔再食甜品。棋哥仲話，家除咗喺屋企，喺其他地方唔敢再著短褲。