財爺《大時代》講到政改

【明報專訊】經典電視劇《大時代》上星期五重播埋大結局，可能唔少讀者都一齊睇住慳妹伏喺方展博懷中，Emily唔知財政司長曾俊華係咪晚晚追，但佢就緊貼潮流，噚日寫網誌都提及《大時代》，話大結局令唔少人「有覺好瞓」，但嚟緊今個星期表決政改，佢覺得無論結果係點，香港政治環境都進入大時代，可能有啲人呢個星期就「無覺好瞓」喇！

指有時要放下首選 否則累鬥累

財爺讚《大時代》監製韋家輝，話即使套劇重播無數次仍然叫好叫座，仲不斷被引用嚟反映社會狀况，即使觀眾對結局滾瓜爛熟，但對方展博、慳妹同龍紀文嘅愛情、友情，仍然感到扣人心弦。財爺話喺追求民主上，有時要放下自己心中首選，換取大多數人嘅共識，呢個往往係艱難嘅抉擇，需要好大勇氣，但係對自己同下一代必要嘅承擔。


佢話，試想想，如果今日你唔就我，聽日我又唔撐你，結果只會「累鬥累」，民主路上永遠唔可以邁步向前。財爺話，期待《大時代》再重播時有不一樣嘅結局，但當然唔係期待丁蟹會戰勝方展博啦。