電腦通訊節想同3「腦場」合作

【明報專訊】一年一度嘅香港電腦通訊節將於8月21至24日喺灣仔會展舉行，今年票價維持30元。主辦單位香港電腦商會明言想同「腦場」破冰，計劃至少同3個電腦商場合作，包括推廣優惠，另會伙拍旅行社向內地及東南亞旅客推廣，吸多啲客入場，期望營業額可以超過去年嘅3億元，另希望人流增加5%。


盼營業額逾3億

近年電腦商場會另行舉辦電腦節，香港電腦商會副主席梁定球話今年希望同電腦商場破冰，初步同黃金電腦商場、福仁電腦廣場、旺角電腦中心商討合作，包括一齊宣傳、推出劃一優惠等，細節要再傾，希望增加人流。


今次電腦通訊節會有約200個展商，有500多個攤位，料推出現金券優惠，樂視到時會展示「香港版」智能手機，樂視市務部主管鍾詠薇話，港版手機會同本港樂視平台內容整合，幾時開賣、價錢等就要再公布。至於以往搞腦場電腦節嘅香港電腦業協會主席葉景祺話，今年有意搞電腦節，細節要再傾，但暫時無打算同商會合作。