郭家麒助理帶發電機入立會

【明報專訊】立法會議員郭家麒嘅助理早前買咗部新發電機，拎入立法會辦事處試機，但立法會職員指發電機內有小量燃油，擔心有危險，要求助理倒掉燃油，助理於是喺廁所將燃油冲走，呢件事被傳媒報道，立法會行政管理委員會（行管會）噚日開會處理呢單case。


Emily問行管會成員陳家洛議員，佢話行管會都覺得拖部有燃油嘅發電機入立法會，會有危險，故會發信提醒郭醫生「下次唔好」。陳家洛話發信係要提醒埋其他議員「唔好咁做」，佢又話行管會都有呼籲大家留意，唔好將有關資料外泄。


郭家麒就話未收到信，佢解釋話因為平時晚上會去屋邨擺街站，為邨民提供醫療諮詢，部發電機係用嚟照明，唔係用嚟佔中，佢懷疑有行管會成員將閉路電視錄影截圖外泄，要求行管會徹查，又已去信私隱專員公署調查邊個泄露資料，侵犯其助理私隱。