長毛鬧CY親疏有別

【明報專訊】特首梁振英（CY）日前先講，想喺政改之後，同持不同政見嘅朋友「有一個新的、和諧的合作關係」，言猶在耳，「長毛」梁國雄就話CY「親疏有別，心胸狹窄」，因為其他議員獲邀去7月1日嘅升旗禮及酒會，但就針對佢唔請佢出席。


政府中人估計唔請因年年示威

Emily就事件問特首辦，但就由民政事務局回覆，指「當局會按每個活動的安排及實際情况擬備適合的嘉賓名單」。咁究竟揀邊啲人邀請？官式答案﹕「我們不評論個別個案。」有政府中人就同Emily講，估計因為長毛年年入去會場示威，唔係慶回歸，所以今年唔請佢；又話唔請長毛，同CY講「新合作」關係無關喎。


長毛去年都無去慶回歸升旗禮，因為當時佢喺監獄服刑，原因係佢衝擊遞補機制論壇，被判入獄。2013年長毛獲邀去酒會，佢確實例牌向CY示威，但入場時，民政總署人員要求佢繞道入場，又畀十幾個保安圍住，結果長毛要等到CY離場先至入到去。


至於其他民主派議員呢？民主黨主席劉慧卿、黨友單仲偕都話收到邀請，但二人都無打算出席。公民黨梁家傑同郭榮鏗就計劃到時去會展一趟。人力陳偉業就話，一向唔去呢啲活動，所以無理到有無收到邀請。梁家傑就話，政府嘅邀請函喺好耐之前收到，即係CY話「新合作」關係前已發出。