鄉局空櫈留畀唐唐

【明報專訊】新界鄉議局噚日舉行「慶祝香港回歸祖國18周年酒會」，近日被傳身體抱恙嘅鄉議局前主席、立法會議員劉皇發（發叔）都有出席。78歲嘅發叔出入時要用拐杖或由別人攙扶，但佢話「身體已經漸漸好轉，係雙腳囉，但咁嘅年紀（身體）已經好好」。酒會仲有邀請全國政協常委唐英年，但唐唐缺席，而台上就一直放咗留畀唐唐嘅空櫈。


顏寶鈴同建制派有講有笑

早前港區人大代表顏寶鈴同張明敏都喺人大WhatsApp群組大鬧建制派政改投票甩轆，顏寶鈴大鬧建制派「垃圾議員」，張明敏就大呼「垃圾議會」。二人噚日都有出席酒會，仲同佢哋口中嘅「垃圾」有講有笑，似乎大家嘅火氣全消喇。


當日建制派因為要「等埋發叔」搞到投票甩轆、政改表決鬧劇收場，但負責政改嘅政務司長林鄭月娥喺酒會上坐喺發叔隔籬，兩人不時咬耳仔，林太仲好細心咁不時扶住發叔，睇嚟林太無因為投票事件而嬲咗發叔。唐唐嘅空櫈一直留喺台上無人搬走，至於點解佢唔去酒會，Emily問過鄉議局主席劉業強，佢話無留意到唐唐缺席喎。