「垃圾議會」張明敏：建制泛民有責

【明報專訊】建制派WhatsApp群組內容外泄，港區人大代表張明敏（圖）被發現曾經用「垃圾議會」形容立法會，對建制派部分議員6．18離場無投票支持政改方案似乎好不滿。張明敏噚日喺慶回歸酒會同Emily講，話覺得呢個不單係佢個人嘅感覺，社會都想知佢哋點解無投票，但佢又話真正原因大家都唔知，唯一係兩個字「蝦碌」，而且議員都承認咗。


張明敏又話立法會被視為「垃圾議會」，無論泛民定建制議員都有責任，因為佢哋都係議會成員之一，「呢個議會做到乜嘢工作？上個禮拜（財委會）11項對民生嘅議程，只係通過兩項」。不過，當有行家問張明敏係咪需要解散立法會，佢就話「未去到呢個程度」。


至於唔少人都好關心嘅WhatsApp對話外泄事件，張明敏話件事已經完咗，唔會再提，仲話將WhatsApp對話外泄係不道德嘅行為，「我無理由將你啲嘢擺上網，又無徵求你同意」。