前記者搞港通訊社 首天籌得11.6萬

【明報專訊】為咗重振傳媒公信力，無綫前記者吳曉東發起網上籌款，成立首間屬於香港人嘅偵查報道通訊社FactWire，主打調查報道，以事實為依據。佢話近年興起嘅網媒同傳統主流媒體，花太多時間喺爭奪煽情故事同忙於更新你有我有嘅即時新聞，忽略揭露重大新聞背後嘅事實，佢話最大嘅衝擊係舊年坐港鐵，有市民一邊用手機睇即時新聞，一邊話家啲新聞都唔知信邊間好，令佢決定將多年嘅理想付諸實行。


吳曉東目標籌300萬

所謂三軍未動，糧草先行，吳曉東噚日開始透過網上籌款300萬元，為期60日，噚日截至晚上9時，暫獲107人捐款支持，籌得11.6萬元，佔集資總額3％。


可請7調查記者做15個月

吳曉東話，300萬夠請7個調查記者做15個月，其中3個月係遣散費，萬一第二年籌唔到錢，都夠錢遣散員工。佢話傳媒行業薪酬一向偏低，又認為人工唔吸引，唔會請到好記者，所以將通訊社記者嘅薪酬待遇，定於較主流媒體高三至五成，月薪由1.8萬至6萬元不等。


吳曉東強調通訊社完全獨立，謝絕廣告、收購合併，佢唔會持有FactWire嘅股份，如果籌款成功達標，就會成立基金，用嚟出糧同應付採訪開支，但佢其實無十足把握籌到咁多錢，如果達標就係一個奇蹟。