英官曾倡港人全搬北愛

【明報專訊】近排成日有港獨派出嚟示威話要「歸英」，根據英國周五最新一份1983年嘅解密文件顯示，原來曾經有北愛爾蘭政府人員提出將港人安置於北愛爾蘭。但好快就有前外交部官員出嚟澄清話當時只係講吓笑。


憂回歸後港人政治前景

據英國《衛報》報道，將香港人移居北愛爾蘭嘅念頭，源自英國學者Christie Davies，佢覺得港人回歸後唔會有政治前景，於是提出喺科爾雷恩（Coleraine）同德里（Derry）之間一個叫Magilligan嘅半島重建香港。有北愛爾蘭政府人員聽到，覺得遷移對北愛爾蘭團結有好處，應該認真看待，仲將佢嘅建議同外交官員商討，討論被記錄喺文件，不過份文件似乎冇傳達上去更高層人員。


正當大家幻想原來一度有機會喺北愛爾蘭生活，但有份寫文件嘅前外交官員David Snoxell已經出嚟回應，話將港人移居北愛爾蘭嘅說法，只係當時同事間開吓玩笑，「緩和吓緊張」。係咪真係講笑？大家自己決定。