古蹟景賢里4開放日 周末派飛

【明報專訊】早前交還政府管理、位於港島半山司徒拔道嘅法定古蹟景賢里，將會喺本月同下月舉行開放日，畀市民欣賞同了解吓建築特色同歷史，入場券喺嚟緊嘅星期六同星期日免費派發。


各設4節參觀時段

4日嘅開放日喺7月25、26號同8月22、23號舉行，每日會有4節參觀時段，分別係上午9點半至11點、上午11點至下午12點半、下午兩點至3點半，同下午3點半至5點。入場券將會喺香港文物探知館、香港公園茶具文物館或香港文化博物館派發，每人限攞其中一節參觀時段最多4張門券。


另外，民政事務局長曾德成噚日發表網誌，話本港博物館入場人數由2000年嘅340萬多人次增加到舊年嘅652萬多人次。上月底仲舉辦第一屆香港博物館節，去到嚟緊嘅星期日，有成70項節目畀市民參加。佢又話康文署每年發出約16萬張博物館通行證，最近仲同廣東同澳門方面商議，開發粵港澳區域博物館證，三地將會各自向持證人提供優惠。