陳健波：早睇淡股市已減磅

【明報專訊】港股噚日大挫827點，保險界議員陳健波話早喺6．18政改表決前已睇淡股市，所以已經減咗磅，而「喺艱難時刻，畀人震出嚟（要斬倉）最可惜」，個別內銀股市盈率（PE）低，長揸仲可以。


股海翻波，波哥教路話，部分券商股如海通，雖然喺香港跌得緊要，但內地仍然升緊，如果唔係有整體問題，都可以喺香港入番啲，佢自己都有趁低入貨。但佢專登囑咐Emily，就算聽完都要小心，因為券商始終有可能因斬倉潮走唔切，大家要留意自己承受能力。


泛民、建制議員對中央救市都有保留，自由黨方剛更話，「股市係全世界嘅，點托？」但佢話自己無乜點買股票，仲講笑話港交所跌咁多，係咪應該買番少少揸手呢？

陳恒鑌照入市「試眼光」

財經事務及庫務局長陳家強去民建聯黨慶時，就繼續用手機住歐洲個市，佢分析，噚日港股波動較大，主要受希臘公投結果影響，又話唔排除希臘會退出歐元區。而最唔信邪嘅係民建聯陳恒鑌，佢噚日朝早仲入市，買咗上實城開（563），結果就跌，佢話只係買少少試眼光，唔係賭身家，所以都唔介意。