尋晃攝影展推廣廢墟文化

【明報專訊】廢墟總予人無限想像，有人覺得似鬼域，唔敢踏足，亦有人鍾意廢墟嘅神秘感，外國就好興廢墟攝影。「荒凝止息」同長春社文化古蹟資源中心喺7月11日至25日搞咗個「香港廢墟主題攝展﹕『尋晃』攝影展」，推廣廢墟文化，等大家可以一睹呢啲被遺忘嘅景致，而且廢墟中透射日光，令人感到廢墟都生機處處。


設導賞時段 廢墟地點保密

今次攝影展喺西營盤西邊街嘅長春社文化古蹟資源中心舉辦，逢周二至周六開放，朝早10點至傍晚6點，仲有攝影師導賞時間，分別喺7月11日中午12點、下午3點，同埋7月18日嘅下午5點。主題分四部分，分別係人生、空間、住客同異地，攝影師係「Sing@荒凝止息」，佢有10年攝影生涯，鍾意行山而發現廢墟之美。


咁究竟今次影展有邊啲香港廢墟呢？主辦單位就話因為唔想咁多人湧去廢墟，所以影展唔會註明係邊啲地方。