馬逢國度大嚿噪音 手機裝App 話有80分貝

【明報專訊】建制派WhatsApp內容外泄風波，搞到唔少人都好擔心，其中「體育、演藝、文化及出版界」議員馬逢國話，雖然佢覺得無咩機密唔畀得人知，但佢都已經叫助理買咗防偷窺屏幕貼，諗住貼喺mon上面，等其他人睇唔到。過去唔少議員畀人影到喺議會內睇相、睇片等而受到批評，但馬逢國講笑話，即使被人影到，其實都可以合理辯解喎。


自稱開會睇戲都同業界有關

馬逢國話自己作為業界代表，即使開會睇戲、睇書甚至睇體育資訊，其實都係做緊同業界相關事情，並非同會議無關。佢覺得議會內最重要係聽人發言，眼睇其他嘢，如果無騷擾到人，亦無阻礙會議進行，就唔覺得有乜嘢問題。


馬逢國話，自己喺會議廳內坐喺經常示威嘅人民力量陳偉業（大嚿）隔籬，聽到佢咁大聲示威都咪話唔煩躁。為咗「證明」陳偉業真係好大聲、嘈親人，佢更喺自己電話裝咗個測音量分貝程式，話多次喺大嚿高聲發言時量度，發現對方大嗌時就會大過80分貝。佢即場測試畀記者睇，即使對住個電話收音位大聲講嘢，都只係70幾分貝，可想而知陳偉業示威有一定嘅震耳程度！