田北俊囑老婆千萬撈貨

【明報專訊】噚日大跌市，中環個個頭耷耷，但自由黨噚日喺中環搞咗個招募新黨員嘅「Happy Hour」活動，就依然有唔少捧場客。自由黨榮譽主席田北俊仲自爆噚日下晝3點幾大跌市下，居然主動出去打電話畀田太Mary，叫佢幫手花咗成千萬撈貨。Emily見佢噚晚面不改容，唔通有錢真係有自由？


田少話，因為自己喺立法會工作忙，所以私人銀行買賣股票嘅事，早已交畀田太打理，但噚日開開吓會見大跌市，都好罕有咁忍唔住行出會議廳打咗個電話為太太出主意，叫佢幫手入多啲。佢話大市無論高低，都好難摸到最高或者最低嗰點，所以無人可以喺最高同最低先郁手。


但佢亦承認，就算再跌都有能力再買，即係可以彌補今次入市損失。Emily心諗，一般市民就未必有呢個能力喇。田少亦拒絕透露自己入咗咩貨，只係喺追問下，承認有買港交所（388）股票，但佢話太太投資仲在行。


早前加入自由黨嘅卓能（131）主席趙世曾嘅長子趙式浩亦有現身，但婉拒接受訪問，亦唔肯評大市。有自由黨中人話，佢遲啲會多就房屋政策發言。自由黨主席鍾國斌就話該黨1月有400多名會員，但至今會員已增加約300人。睇嚟搞「Happy Hour」有啲用喎！