《南早》專欄停 長平稱遺憾

【明報專訊】早前《南華早報》一口氣終止4個專欄作家Philip Bowring、Steve Vines、Kevin Rafferty同Frank Ching嘅專欄，Emily聽聞原來同一時間，《陽光時務週刊》前主編嘅自由撰稿人長平嘅專欄都被停咗。


Emily致電現居德國嘅長平查詢，佢證實5月收到《南早》總編王向偉來信，話由於專欄版面調動，加上資源有限，唔再為長平來稿嘅中文文章作翻譯，所以叫佢唔使再發表專欄。


由2010年起每兩周供稿畀《南早》一次嘅長平話，對停專欄感到好遺憾，因為熟悉中國事務又「能說話」嘅評論人愈來愈少，過去4年基本上寫嘅嘢都照登，包括六四，唔猜測停專欄係唔係政治原因。


指定期專欄改約稿 大班唔寫

另外，大班鄭經翰噚日確認，由《南早》通知所有定期作家專欄都取消，改為逐篇約稿，佢嘅稿費由每字5元減至3元，覺得作家要按指定題目寫稿係變相「審查」，決定唔寫。Emily噚日搵過王向偉同《南早》副總編譚衛兒，至截稿前未有回應。