286狗齊入屋避颱風

【明報專訊】颱風來去匆匆，有愛錫流浪貓狗嘅義工，前日喺網上呼籲，市民如果見到避雨避颱風嘅流浪動物，唔好趕走佢哋，畀個容身之所佢哋。粉嶺流水響開設狗場嘅「香港流浪狗之家」，喺facebook上載幾張相，話颱風期間，義工將近300隻狗狗安置喺室內，網民見到咁多狗狗相安無事，大讚狗狗好乖。


開埋風扇同冷氣

「香港流浪狗之家」創辦人Angela Chan話，試過10號風球襲港時，因準備不足，搞到好多圍欄同門都被風吹走吹爛，所以今次「蓮花」未正式登陸就開始準備，預先騰出更多室內空間，做好清潔。當天文台掛8號波，佢哋約20分鐘就將286隻狗狗帶入近千呎嘅室內，仲開埋風扇同冷氣畀佢哋。


狗狗平時訓練有素，唔會喺瞓覺嘅地方大小便，為咗狗狗有更多空間郁動，Angela同佢個囡間房都畀埋狗狗入嚟，與狗同眠。