曾德成入哈薩克「金字塔」

【明報專訊】特首梁振英要熱烈響應中央「一帶一路」國策，民政事務局長曾德成噚日寫咗篇哈薩克斯坦遊記，介紹呢個中國西部鄰國嘅歷史同機遇。佢話香港97年回歸時，哈薩克斯坦同年遷都阿斯塔納，經過18年建設，喺大漠上建起一座新城市，人口增至80餘萬，成為哈薩克斯坦第二大城市。


哈薩克斯坦前身係蘇聯加盟共和國，係最後一個宣布獨立嘅加盟國，1991年12月獨立定都阿拉木圖，到咗97年12月遷都阿斯塔納，哈薩克語就係首都嘅意思。


曾德成話新首都市中心起咗多幢地標式建築，包括著名建築師諾曼．科士打設計、60幾米高嘅玻璃金字塔，其底層設有1200個座位嘅音樂廳。金字塔內仲有一個高空會議室，每隔3年，哈薩克斯坦會邀請各大宗教領袖喺度開高峰會議。金字塔名為和平和諧宮（圖）。


曾德成話，舊首都阿拉木圖，家就籌劃借助中國推動發展「絲綢之路經濟帶」嘅勢頭，諗緊唔同發展大計加快建設。


（曾德成網誌圖片）