聯合出版社 抗戰書列重點書目

【明報專訊】聽日書展開檔，相信雨傘運動嘅書會係焦點之一，不過Emily噚日去集三聯、商務、中華書局等五大出版社一身嘅聯合出版集團嘅記招，見佢哋重點書目中唔見關於撐或反雨傘運動嘅書，而抗戰書就榜上有名，包括唔少描述港人喺日佔時期生活嘅書，以紀念抗戰勝利70年。出版集團公關同Emily解釋，佢哋喺書展會集中賣自己出版社出版嘅書，如果讀者想買其他書，可以去門市買。


重點冇雨傘運動 聯合：書展賣自己書

Emily睇番書目推薦，當中都有啲關於政治嘅書，包括教院亞洲及政策研究學系講座教授呂大樂嘅《香港模式﹕從現在式到過去式》。推介書亦有講法治嘅書，如港大法律系教授陳弘毅嘅《法治香港﹕香港的法律與政治》。仲有一本關於警察嘅，不過唔係讚或彈警員，而係講女警，係由嶺大社會學及社會政策系助理教授陳效能同港大犯罪學中心名譽研究員何家騏合著嘅《香港女警六十年》。


如果想輕輕鬆鬆睇本書，自由黨張宇人今年都有執筆，出書《金漆招牌》，講香港飲食品牌成功之路。