劉永好「抗旨」 大手減持民行A股

【明報專訊】今次中國股災危機，完全可以體現到中央一聲令下，全國幾咁一呼百應，券商要托市、股東有錢嘅要增持，無錢都要吶喊助吓威，不過凡事有例外，好似前中國首富劉永好，佢竟然夠膽喺上周三狂沽民行A股，估計套現咗超過20億元（人民幣•下同），惹嚟網民瘋狂抨擊，話佢趁國家救市逃生、政治唔敏感咁話喎。


民行A股噚日喺上交所出公告，話劉永好控制嘅新希望集團同南方希望實業，上周三（8日）喺市場狂沽總共超過2.6億股A股，佔嗰日民行成交16%，公司股價仲大跌超過5%，恐怕好難話同佢無關係。用嗰日民行收市價10.19元計，劉永好今次掟貨套現估計約26億元，不過呢排中央嚴令一眾股東唔准減持，佢竟然為咗區區廿億破例（對小琴就唔係區區），有好多網民就鬧爆佢，仲「祝福」佢好快有人約佢傾偈喎。


[小琴密語]