攔車葵聯「居民」 屬民建聯「義工」

【明報專訊】政府日前公布葵聯邨嘅水辦驗出含鉛超標，民建聯立法會議員陳恒鑌（Ben）同社區主任梁嘉銘喺官員落邨時一度同居民攔阻官員嘅車離開，要求向職員遞信。有一個身穿白色衫、身形較胖嘅男人，更一度情緒激動，阻住官員架車走，要阿Ben幫手勸開。民主黨何俊仁辦事處嘅社區主任劉肇恒噚日同Emily講，認得嗰個白衫男人，指對方係民建聯職員。阿Ben噚日就話對方只係民建聯義工，唔係職員。


劉肇恒話，見過呢名男子喺撐政改方案同反佔中嘅簽名街站出現，對方亦曾經於青衣長安邨嘅民建聯地區辦事處出沒。有民主黨成員向本報提供一張相片，相中有一個同呢名男子相似嘅人，喺反佔中簽名街站中工作，而兩人嘅衣服款式一樣。


梁嘉銘：唔係搵人扮居民

梁嘉銘噚日承認呢個白衫男子係民建聯義工，但無明言呢個義工係咪居民。佢話，當時因為居民想衝前，呢個義工想截住架車，畀機會居民表達訴求，佢哋都唔係好控制到。但梁嘉銘強調，該黨唔係想搵人「扮居民」，希望大家唔好以男義工做焦點。