民主思路呻窮 施永青加入做顧問

【明報專訊】湯家驊（Ronny）成立智庫「民主思路」後，近排開始約見唔同政黨，希望梳理總結不同意見，又約雨傘團體同主張修憲嘅學生等，目標係半年內整本《政改出路備忘錄》。繼前日連同民主黨見面，民主思路下星期會見工黨，28號就會去Ronny前政黨公民黨。


施：或提供資金支持

民主思路上月喺炮台山租用一個900呎辦公室，同公民黨都係同區。Ronny噚日與傳媒茶敘時透露，民主思路開支增加，搞到佢欠緊銀行錢。


Ronny話民主思路希望未來可加強同青年人、商界溝通，噚日仲宣布中原地產創辦人施永青加入出任榮譽顧問。施永青話目前香港撕裂，好開心見到有組織尋找出路，施先生話佢會觀察民主思路工作3至6個月，先決定係咪加入成為正式成員。至於會唔會資助智庫工作，施永青話會用自己嘅方式支持，包括提供資金。


重申智庫唔做政治交易

Ronny話要爭取商界支持，唔止係錢，因為喺研究取消功能組別上，都要爭取商界支持先可以成事，希望商界喺精神、原則、資金上都支持民主思路，但重申智庫唔會做任何政治交易。