聲援內地維權律師 郭榮鏗邀袁國強「個人」響應

【明報專訊】40幾個法律界人士包括13名大律師公會前主席，日前發起全球網上聯署，聲援內地200幾名被拘留嘅維權律師，做過公會主席嘅律政司長袁國強前日已表明唔會參加。不過，立法會法律界議員郭榮鏗（Dennis）再去信袁司長，認為佢可以考慮用「個人身分」參與聯署，因為特首辦曾公開表明，問責官員可以個人名義參加民間活動聯署。袁司長噚日堅持話，前日出聲明時已解釋得好清楚，意味唔會聯署。


政府曾表明可個人名義聯署

Emily睇番袁司長前日嘅回覆，佢話尊重民間團體表達意見嘅權利，「但作為特區政府官員，律政司司長不適宜評論或干涉純屬內地範圍的事務，因此不會參與相關聯署行動」。Dennis就話，如果袁司長認為唔方便以律政司長呢個公職身分參與聯署，可以考慮以大律師公會前主席或執業資深大律師等個人身分參加。佢又話，以往問責官員包括袁司長，亦曾參與民間活動嘅聯署。事實上，梁振英等唔少問責官員都有參與過反佔中或保普選嘅簽名運動。


Emily睇番袁司長曾經參與過乜嘢聯署？原來係「保普選、反暴力大聯盟」發起嘅支持政改簽名運動。Dennis喺信中，大讚袁局長係現任律政司長、執業資深大律師及大律師公會前主席，若參與聯署，必定能夠令全世界特別係中國政府更正視事件，同本港法律界訴求。袁司長解釋是否合理？就留番畀讀者去評價。