英譯論文面世 胡鴻烈圓願 剖析兩韓問題 「對現代人有益」

【明報專訊】終於有人翻譯咗樹仁大學校監胡鴻烈用法文寫成嘅博士論文喇！話說現年95歲嘅胡校監，1952年喺法國巴黎大學完成法學博士學位，以《韓國問題》（The Korean Problem）為博士論文，以法文寫成，4年前出版成書，校監有感呢本書有助現今嘅人明白韓國問題，故一直希望被譯成英語。


見成品「一路摸一路笑」

樹仁大學法律與商業學系系主任趙文宗話，將論文譯做英文係校監多年嚟嘅心願，今年都問咗佢幾次本書搞成點，連香港大學頒授名譽博士畀佢嗰陣，都急不及待提到本書就嚟出版。佢又話校監收到成品後非常開心，一路摸一路笑，又睇吓邊個幫佢寫序。


有份校對同編輯此書嘅法商系講師林慶舟話，此書具前瞻性，又探討多個至今仍熱烈討論嘅問題，建議律師、學者同學生閱讀。佢話，因1953年只簽署停戰協議而非和平協議（即雙方同意結束戰爭），北韓（朝鮮）與南韓（韓國）仍處戰爭狀態，加上當時聯合國嘅常任理事國喺投票決定係咪開戰時，蘇聯缺席，令人質疑個決定係咪有效；當年中國又以正當防衛為名，出動志願軍協助北韓，但以自衛可否作干預別國戰事嘅原因呢？呢啲問題至今未有定論，而呢本書就深入剖析問題，值得研讀。