謝志峰告別《城市論壇》 籲維園阿伯勿蝦新主持

【明報專訊】香港電台節目《城市論壇》主持人謝志峰噚日最後一日主持《城市論壇》，一班親建制派團體似乎有備而來，喺直播期間集體企起身抗議同離場，連謝志峰都話好欣慰，因為班撐政府嘅人無傷人、無掟嘢，抗議手段都算溫和。雖然噚日台下唔少人鬧謝志峰，但當中卻有人喺節目完結時捉住佢玩自拍合照。不過噚日都有唔少人追罵謝志峰，要出動近30名警員護送佢離開。


之後動向 「可以幫手湊孫」

謝志峰同港台嘅合約今年10月31日完結，佢噚日喺節目後話「照目前消息，今日係最後一日主持節目」，不過，放暑假後佢會返嚟繼續做監製直到約滿。至於之後去向，佢笑言「好多份工等我做，例如返屋企做義工啦，或者做個好公公，幫手湊孫」。


擔任主持十幾年嘅謝志峰話，已經搵咗新主持，但唔可以透露接任人身分，佢相信接班人一定可以壓到場。謝志峰話會事先同一班「維園阿伯」打定招呼，希望佢哋唔好蝦新主持。謝志峰亦寄語新主持，「一定要包容，唔好動氣」，因為港台作為政府機構，聽民意係責任。


寄語新主持包容勿動氣

民建聯副主席周浩鼎噚日都有去城市論壇做台下觀眾，雖然有唔少維園仁兄大罵謝志峰，但周浩鼎就講公道話，話謝志峰做節目主持時都算公正，好似噚日台上有講者批評民建聯，謝志峰都肯畀佢喺台下發言回應反駁。佢話謝如果能夠繼續做主持就好，佢唔做主持人可惜。