網民：高科技遙距式落區 新民黨人宣傳相萬能key

【明報專訊】新民黨葉家明係邊個，大家可能好陌生，但噚日佢喺網上就「一炮而紅」。葉家明一張介紹「證件相優惠攝影日」以及區內大型滅蚊工程嘅傳單喺網上熱傳，皆因有眼利嘅網民，質疑葉家明用自己嘅相key入滅蚊現場嘅環境相，營造佢親赴現場嘅效果。


Emily搵咗葉家明求證，佢承認自己將佢嘅證件相key上滅蚊相度。不過，葉家明強調當日有全程跟足去睇滅蚊，只係要趕製宣傳單張，所以key相後佢都承認咁樣「係做錯咗」。有網民就批評傳單上嘅證件相點解打側身影嘅，葉家明話張相只係希望做個效果畀街坊睇。


網民「阿炸」前日喺facebook分享葉家明嘅傳單後，已經成為網上熱話。有網民留言話呢啲叫「高科技搖（遙）距式落區」，亦有人話「都冇錯字，起碼都比民建聯強」。