美麗華刪抽水圖 出快閃遺憾聲明

【明報專訊】港大校委盧寵茂醫生「世紀一跌」引發改圖潮，美麗華旅遊都唔執輸，前日喺facebook專頁上載咗張圖，將盧醫生抱膝一幕key落美麗華門市，留言「洗乜守喺門口咁辛苦？梗係用網上報團啦，平過門市架！」網民反應唔錯，但美麗華即晚刪圖，出聲明指對改圖引起不安「深表遺憾」，一朝瞓醒，噚日連份聲明都消失埋。網民鬧爆「又要威又要戴頭盔」，聲稱「永不錄用」呀！


Emily問過美麗華總經理李振庭，佢話專頁由公關部同事負責，幅圖雖然無直接表明對事件嘅立場，但管理層唔鍾意「抽人哋水」，「我哋唔係無錢賣廣告，唔想用呢個方法宣傳」。佢否認受壓，話刪圖純屬商業決定，希望維持公司一貫推廣方向咁話。


至於點解連聲明都要「毀屍滅迹」？佢就話發聲明主要為咗「表達態度」，網民凌晨時分最活躍，既然大家睇咗，「咁已經係告一段落」。對於網民聲言杯葛，李振庭話絕對唔擔心，因為「家都唔係做晒全香港嘅客」，覺得無可能取悅所有人。