EQ赴非保育 聞殺象噩耗

【明報專訊】美國牙醫日前獵殺津巴布韋獅王塞西爾（Cecil）震驚全球，好多人要求追究到底；民建聯議員葛珮帆（EQ）趁暑假就再次去非洲，參與保育瀕危大象及犀牛嘅活動。不過佢去到當地即收到壞消息，知道7月28日早上巡邏隊喺肯尼亞Tsavo West國家公園發現咗5具大象屍體，相信仲係來自同一個家庭，包括大象媽媽同佢4個孩子，大象嘅頭面都被盜獵者斬咗以獲取最多嘅象牙。


EQ話，肯尼亞政府同當地做保育工作嘅Big Life Foundation巡邏隊，正全力搜捕非法盜獵者，已知有兩人被捕，若一經定罪，最高刑罰為終身監禁。


EQ去年9月都有去非洲，而今次係再次應野生救援（WildAid）及非洲多個保育組織邀請，去當地考察及同當地專家討論大象及犀牛嘅保育工作。EQ話近年非洲非法獵殺大象情况日趨嚴重，每年約有3萬至4萬頭大象被殺取牙。佢話香港係國際象牙走私黑點之一，佢要求香港政府加強象牙買賣嘅監管，最好係禁止本地象牙買賣，為保護非洲野生動物出一分力。