鄧國威餞別宴食到11月

【明報專訊】公務員事務局前局長鄧國威噚日接受港台《舊日的足跡》訪問，回顧37年公務生涯時話，最難忘係1980年代喺沙田政務處工作。話說當年日本百貨公司八佰伴喺沙田開業，時任沙田專員「靈機一觸」想為沙田居民「做番啲嘢」，於是帶埋佢去日本游說百貨公司總裁，喺沙田放煙花慶祝開幕。心水清嘅讀者都記得，當年嘅專員咪係前特首曾蔭權囉。


難忘曾蔭權爭取日資放煙花

其實曾蔭權2012年卸任前亦曾經講過，1984年成功爭取喺城門河放煙花嘅小故事，不過就只係講當年身為「小小DO（District Officer）」嘅佢，硬住頭皮去搵署理港督夏鼎基商量，但就無提到去日本游說一事。


近年有政務官（AO）出身嘅前高官捲入貪腐醜聞，鄧國威就寄語想入政府嘅年輕人，唔好諗發達；而好彩佢唔揸靚車、唔飲紅酒又唔賭，平日最大花費係旅行，計劃年底同屋企人一齊去旅行。


鄧國威因為「不能預計的家庭理由」突然呈辭，近排最忙係同AO同事食飯餞別，餞別宴要排期到11月，組團餞別嘅仲包括佢十幾年前請嘅一班AO同事。不過，更令佢預計唔到嘅，應該係連佢海外親戚都即刻email佢，問佢屋企究竟發生咗啲乜嘢「不能預計」嘅事，搞到佢要逐一報平安。