卿姐攔路硬邀亞瑟王 死纏爛打獲回應「揀個吉日」

【明報專訊】港大校務委員會委員李國章（亞瑟王）同民主黨主席劉慧卿（卿姐）噚日喺數碼電台（DBC）走廊「狹路相逢」，兩人都係政壇高手，點會無好戲？卿姐就先發揮幾十年前記者本色，先發制人，開口邀請對方上佢個網台節目《議會內外》。好彩，亞瑟王都唔係省油嘅燈，話「揀個吉日」先再去！


亞瑟王近排因為港大校委會討論陳文敏副校長任命而人氣急升，不過較少人知道嘅係其實佢係DBC董事會主席，算係亞瑟王「主場」，亞瑟王見到卿姐立即舉手作揖歡迎，兩人握晒手，真係未到戲肉已經好精彩。


亞瑟王借卿姐賣廣告

點知卿姐「記者上身」，爭取機會問亞瑟王會唔會上佢個節目《議會內外》，即刻畀在場DBC員工笑佢喺人哋個台度「搶生意」，亞瑟王連消帶打，話卿姐已經上咗DBC、驚撞題目，又借卿姐幫DBC買賣告，話卿姐「上嚟咪證明我哋DBC好公平、公正！」

要打發走卿姐又點會咁易？卿姐就以亞瑟王上過無綫為例，問佢上《議會內外》「又有乜問題？」最終逼到亞瑟王話，會「揀個吉日」。卿姐臨走話畀亞瑟王「激死」，唔知亞瑟王敢唔敢走卿姐數？