無懼伊波拉 IT男赴非跑步籌款

【明報專訊】Emily唔少朋友都會趁假期離開香港旅行。今年28歲、本身做IT嘅Alpha，已經10年無離開過香港，但佢上年冇揀歐美日韓東南亞，反而選擇同奧比斯去到當時伊波拉肆虐嘅非洲，參與埃塞俄比亞慈善跑，為奧比斯籌款，兼且體驗奧比斯喺當地嘅救盲工作。


本身有跑過香港街馬嘅Alpha就同Emily講，當地人同香港人都幾唔同，跑步時係會好開心，「好似high大咗咁」，會無啦啦圍圈唱歌跳舞。


Alpha又同奧比斯一行人去過一個窮困農村，佢話當地小朋友見到佢哋派糖同文具時好開心好興奮，圍住派禮物團友嘅小朋友個個都伸手出嚟，但又好有秩序唔會搶。佢仲話比着香港好多小朋友，見到人派呢啲禮物可能都只係會「繼續玩iPad」，覺得當地小朋友未必有咁多物質，可能會比較有童真。


Alpha今年11月會再接再厲，再去埃塞俄比亞跑10公里。奧比斯上年嘅團隊就有7個人，共籌到20萬，佢哋就話希望今年可以多啲人參加，籌更多善款支持佢哋喺當地嘅救盲工作。