新聞類別
副刊
詳情#
【明報專訊】特首梁振英（CY）噚日去會展出席抗日勝利戰爭70周年圖片展，去到會展無示威者，反而有十幾個拎住鮮花同生日卡嘅中年男女，喺場外記者採訪區外一直守候，原來佢哋知道CY聽日61歲生日，打算為佢賀壽，送上鮮花同生日卡。而CY喺活動完結離開時原本對記者提問充耳不聞，但聽到有人同佢賀壽，就返轉頭收花見吓fans。
其實活動未開始，呢班CY粉絲已經喺會場外守候，當CY離開，記者們都想追訪時，呢班粉絲為咗突圍而出，就好齊心咁大叫「CY, happy birthday！」、支持CY等口號。原本呢，CY揮揮手就已經行走咗，點知佢聽到支持者聲音，突然一轉身，笑晒咁行埋去主動接過花束同生日卡，CY至少收咗3紮花。
包括南華金融非執董
大批行家見到咁，可以話係呆晒，亦好想知道呢班係咩人，其中代表受訪嘅係南華金融非執行董事謝黃小燕，佢話今次有十幾人參與，來自唔同團體，好似公職人員關注組、同心協會等，至於點解送花同卡，佢話因為花同賀卡都好平，相信特首可以收，又有多啲心意喎。咁日後CY出席活動佢哋會否撐場支持？謝太就話唔會喇，因為生日一年都係得一次。
CY有咩生日活動？可以肯定嘅係，佢聽日會帶同一班官員外訪珠海，晚上返港，屆時佢會見當地市領導同考察珠海橫琴新區，以及港珠澳大橋建造工程。
回應 (0)
