林健鋒：甩轆事件見真情

【明報專訊】政改6月表決時建制派投票「甩轆」，當時主角之一、提出「等埋發叔」嘅經民聯林健鋒，似乎已走出陰霾，回復心情，佢接受港台訪問時講，喺今次事件中體會到「患難見真情」，又話同民建聯大家都無互相指摘，大家都願承擔事件。佢又同Emily講，事件後確有一段沉痛期，但沉思過後就要提起精神重新上路。


「等埋發叔」事件後曾落淚道歉嘅林健鋒話，佢汲取咗教訓，對於事後有唔少冷嘲熱諷，又有人以「豬」嚟取笑佢，佢就話有意見佢聽取，有錯會認，有則改之，無則加勉喎。佢話事件反映建制派團結及互信係好重要，又話將來有突發事件時，要絕對相信組長嘅指示，否則難叫做團結。


林健鋒同Emily講，呢次除咗有人批評，亦有唔少好耐無見嘅朋友向佢傳短訊、電郵等打氣慰問，令佢好欣慰。