駐軍總部 規劃師申轉辦酒店

【明報專訊】駐港解放軍喺1997年進駐香港之後，總部一直都喺添馬艦，不過近期有人兩度挑戰呢幅地皮嘅用途。「智仕顧問有限公司」舊年9月入紙申請將呢塊地皮由「軍事用地」變做「酒店」用途，畀城規會否決咗，佢再接再厲，今年再入紙申請，仲提出軍營設施可以搬去尖沙嘴同昂船洲嘅軍營。


智仕顧問有限公司嘅董事叫薛國強，之前有傳媒訪問過佢，佢話自己係退休政府規劃師，入紙申請唔係因為本土派同中港矛盾，只係覺得從規劃角度，呢個地皮最適合發展成能夠瀏覽維港嘅酒店，反而做軍營就同中區嘅發展唔協調。


呢個申請會畀公眾查閱同提出意見，截止日期8月21日，城規會暫定喺10月9日會議討論。Emily噚日都有問駐港解放軍點睇，不過佢哋冇回覆。