熱愛返工 張建宗﹕打呔已開始興奮

【明報專訊】雖然唔少人形容政府係「熱廚房」，但身兼「打工仔」同主理工人福利嘅勞工及福利局長張建宗，就話熱愛工作，佢話每日返工前、企喺鏡前打領呔，就開始興奮。張建宗形容自己生活極有規律，「每朝5點半起牀，一邊運動，一邊看電視新聞……基本上8點我已進入飛行高度，9點往特首辦『早禱』前已做了很多工作」。啲僱主知道張局長咁勤力同熱愛工作，會唔會叫僱員仿效㗎？


張建宗接受馬會刊物《駿步人生》專訪時大談勞福政策，佢形容可以成功推出長者生活津貼，係今屆政府成立以來第一個「入球」。張建宗憶述爭取立法會議員支持「長生津」嘅過程好艱巨，因為有部分政黨同議員反對設立資產入息審查，幸最終都可以通過。


張建宗話，馬會喺推動長者服務貢獻良多，每年透過慈善基金投放重大資源支持社會服務，笑言要多謝馬會，如果無馬會、無獎券基金，就未必推行到咁多有意義同龐大嘅計劃，「所以『馬照跑』對香港很重要」。