解放軍twins遺憾不能為港捐血

【明報專訊】400名駐港解放軍噚日喺佐敦槍會山軍營駐香港部隊醫院，參與由香港紅十字會舉辦嘅捐血活動。Emily去到軍營頓時眼前一亮，解放軍好識做，搵咗成班後生仔女當「model」畀記者影相，當中包括樣貌可人嘅駐軍twins陸瀟及陸琪。


孖生姊妹已準備為香港灑熱血，但紅十字會職員話孖女啲感冒剛好番，唔符合捐血資格，搞到兩姊妹捐唔到。兩姊妹就扁嘴話好遺憾，因為佢哋今年8月尾就服役完畢，返去內地讀大學。


陸琪就話兩姊妹兩年前啱啱高考完，喺網上見到解放軍徵兵消息，父母當時亦好支持佢哋嘅決定，於是一齊去當兵，仲可以一齊駐港。


辦第18次捐血 官兵：增與港人了解

今次係解放軍第18次參與同類活動，有捐血官兵話，捐血除咗可以增進解放軍與港人之間嘅情誼同了解，仲係一種光榮！

香港紅十字會輸血服務中心顧問醫生李卓廣話，紅十字會每年都會接受唔同團體嘅捐血，而喺香港嘅紀律團隊中，解放軍係人數最多嘅單日捐血團體，合共400人，而香港警察訓練學校就有約80人。佢仲話今次活動大概可以收集到16萬毫升嘅血，而自1998年起已經有超過6700個解放軍捐血。


家香港中央血庫嘅血量偏低，佢希望每日可以有1100人捐血，咁就可以穩定到血源。