籌得300萬 FactWire 成立 吳曉東：盼賣新聞成收入來源

【明報專訊】FactWire事實傳真通訊社用咗唔夠兩個月就籌到300萬元，噚日下晝宣布成立。做過無綫記者嘅發起人吳曉東同Emily講起時眼濕濕，話知道籌款達標之後好感動，「好似發夢咁，無諗過可以靠公眾籌錢做新聞機構」。吳曉東仲話，噚日中午收到網上集資平台FringeBacker通知話成功集資，「好似見證住個BB出世」。


至於集資成功後會點做，吳曉東就話，會喺網上發起投票，等有份捐款嘅市民投票，揀出通訊社嘅中文名。佢又話將會成立信託基金，亦會有兩星期嘅公開招聘。Emily問吳曉東會唔會已經打算搵邊啲行家加盟，佢就話希望可以靠公開招聘請到合適人選，如果請唔到先會考慮主動搵行家加入。佢仲話心目中已經有目標，不過就唔方便講係邊個住。


吳曉東又話，籌款達標後，噚日籌款多咗20萬，「犀利過之前任何一日」，不過佢話通訊社長遠唔能夠靠群眾集資，籌款計劃會繼續去到9月底，不過成立咗信託基金之後，任何人都可以支持，但希望其後可以靠賣新聞作為主要收入來源。