電腦通訊節今開幕展商信丁財兩旺

【明報專訊】「香港電腦通訊節2015」今日至下星期一喺灣仔會展舉行，參展商各自出招吸引顧客。例如有店舖會喺每日開設4節特售時段，購買特選手提電腦後，會送一個有21種產品嘅「福袋」，內有HDMI線、路由器（Router）等。Emily同參展商傾偈，唔少人都話對今年人流同埋營業額都有信心。


香港樂視（Letv）市場部經理曾敬君話，今年佢哋第二次參展通訊節，相信憑住大會嘅口碑，加上各項優惠，可以吸引更多人入場。Dell今年第一次搞限時拍賣，例如今日會推出一部價值3589元嘅Dell U2515H 25吋顯示器，以底價1蚊起標競投。


近期興起嘅航拍，會場內一樣搵到佢嘅蹤影。香港航拍專門店經理陳駿偉話，今年對電訊節入場人數有信心，仲預測今次航拍銷量會超過1000部。佢又話舖頭有賣可以畀初階人士玩嘅航拍機。例如一款實時高清航拍機，原價售999元，推廣價399元。


大會話舊年入場人數有70萬，預料今年人流可以多5%。大會入場費30元。