民記又蝦碌 PopCorn變PornCorn 網民：成功爭取「色情粟米」

【明報專訊】位於將軍澳港鐵站上蓋嘅PopCorn商場，上禮拜四一幅假天花塌下，碎片擊傷咗當時行經商場嘅一家三口。呢件事令區內居民關注商場設施問題，民建聯區議員莊元苳當晚隨即喺附近貼上海報，要求港鐵同領匯（現稱領展）檢查商場天花，確保市民安全。


不過，呢張海報一貼出，即刻有網民發現串錯英文字，PopCorn商場變咗「PornCorn」，而Porn意謂色情之類，網民講笑話，民建聯竟然為當區成功爭取「色情粟米」。


莊元苳回覆Emily話，呢件事都令佢有啲尷尬，佢解釋當晚塌天花後，佢同辦事處職員都好關注，落去觀察後想第一時間出張海報提醒居民，搞到嗰日成10點幾先整完海報，相信同事可能做得太夜，忙中有錯，但講明唔會責怪同事。佢又話其他派畀居民嘅傳單無串錯英文，咁啱淨係得嗰張海報出事，第二日已經除下，仲話自己下次會更小心。