錯旗事件傳導演被炒 《星期日檔案》職員收警告

【明報專訊】無綫周日（23日）夜晚播出嘅《星期日檔案》「抗戰印記七十年——誓保河山」，日前被揭錯用五星旗，而非國民政府軍隊旗，無綫改正並道歉；事隔一日，有無綫中人話4個有份負責節目嘅同事，由記者到導演，全部都收到警告信，而據知導演被炒，但無綫發言人話，對於員工人事安排不予置評。有無綫中人話，相信今次出錯旗真係純粹甩轆，唔係擦鞋。


出錯旗事件源於節目中抗日戰爭嘅畫面，中國軍隊以五星旗展示，而非國民政府軍隊旗幟，無綫前日發現出錯，已經修正片段重新上載並且道歉。不過，有網民批評另一內容，話更正版本中，日本國旗變咗做日本軍旗（旭日旗），話應該要「國旗對國旗、軍旗對軍旗」。無綫新聞及資訊部解釋，節目中動畫所用嘅「旭日旗」，係當時日本軍隊採用嘅軍旗，喺抗戰畫面經常出現。


無綫：不評論人事安排

另外，有團體就抗戰勝利70周年喺中央圖書館搞咗個圖片展，而保釣行動委員會約10人噚日去會場請願，要求政府解除對啟豐二號出海嘅禁制令，將釣魚島問題寫入教科書，並將9月3日訂為永久公眾假期。


另一邊廂，港區人大代表陳勇接受《人民日報》海外版專訪，佢話已經連續3年喺全國人大會議提出，擴充抗日老戰士聯誼會做「香港老戰士活動中心」、建立「香港抗日（東江縱隊）歷史博物館」等；仲叫本土派了解吓當年本土游擊隊抗日嘅英勇行為。