曾鈺成讚財爺林鄭有能力

【明報專訊】前港區人大代表吳康民早前接受電視台訪問，自爆曾經提醒立法會主席曾鈺成，對於選特首「千祈唔好制」，又大讚財政司長曾俊華可以出任特首、下屆特首應由公務員擔任呀咁。曾主席噚日出席公開活動時，就確認2012年時考慮過選特首，亦有同康民叔提及，對方就話選特首好危險，叫佢「唔好制」，而佢考慮咗一星期後亦放棄參選。


咁曾主席又認唔認同曾俊華有魄力，可以出任特首呢？佢就話相信呢個係康民叔個人意見，認為特首無話邊類人先啱做嘅，但佢都認同司長有豐富管治經驗，或更易去駕馭局勢，曾俊華同政務司長林鄭月娥都係有能力、有心為香港嘅人，至於佢哋係咪願意參選特首，就係佢哋個人意願喇。


曾主席又話，睇報紙知道新民黨主席葉劉淑儀有興趣選特首，不過佢就唔肯點評各人係咪適合做，因為個個都係朋友，喺傳媒面前評論朋友唔係佢作風喎。