寵物急救班一開即滿 下年或增至14班

【明報專訊】寵物係唔少人嘅良伴，主人都想佢哋健健康康，但假如佢哋突然身體唔舒服，好似停止呼吸或流血不止，你識唔識處理？聖約翰救傷會同香港獸醫學會一齊搞嘅寵物急救課程就好受歡迎，一開額滿，學員噚日上堂，就搵假狗嚟學習幫狗狗做人工呼吸。


理論加實踐 學費800元

呢個一日制課程，上晝教急救理論，下晝學員要落手落腳幫假嘅狗仔同貓咪量脈搏、洗傷口同埋做心肺復蘇等。唔少步驟真係唔講唔知，例如幫狗狗洗傷口前，要喺傷口查水溶性潤滑劑後，刮走傷口附近嘅狗毛；幫貓量脈搏就可將人手放喺股動脈，感受貓脈搏。


聖約翰救傷會總監鍾展鴻醫生話，會內有70幾個寵物急救導師。佢哋今年第一次開公眾急救班，話報名反應熱烈，5班課程喺一日內爆滿。每班急救班有40人，學費800元，佢哋計劃出年班數加到14班，但詳情未知。


做廣告業嘅吳小姐養咗隻松鼠狗，佢話狗仔有先天呼吸問題，佢唔想見到寵物唔舒服但自己幫唔到手，所以想了解寵物健康多啲。


課程駐場獸醫戴季玲醫生提到以前有寵物主人因為貓發燒，但係主人畀貓食幼兒退燒藥，貓仔最後腎衰竭死咗。佢想用呢個例子話畀主人知，如果對寵物病情有疑問，要盡快向獸醫查詢。佢話家好多寵物主人偏向上網睇解決寵物病情方法，好似信上網多過信醫生。