阿Ben高佬帶「高sir」巡黑點

【明報專訊】民建聯早排搞「衛生黑點」搜查，搵出唔少地方多垃圾，而政府其後就搞咗個全港清潔行動回應嘞，唔少高官呢排都有落區宣傳清潔信息，又搵人加強掃街、清渠，民建聯陳恒鑌（Ben）同「高佬」何俊賢，日前就帶埋「高sir」落去視察吓啲黑點情况。


邊個係高sir呀？原來係食物及衛生局長高永文嘅紙板公仔。阿Ben話有啲黑點情况已經改善，當然要畀個like政府，不過，佢哋亦見到一啲黑點仍然係一堆二堆垃圾棄置街頭。阿Ben同高佬喺深水埗大南街就見到好多發泡膠盒，於是鬼鬼馬馬搵埋高sir喺膠盒山後玩「伏匿匿」影相，當然仲加一句，叫高sir快啲搵人去清理垃圾喇。


講開民記，佢哋除咗關心垃圾問題，佢哋嘅專業事務委員會噚日同香港註冊中醫學會慈善基金，合作搞中醫義診計劃，先以觀塘區做試點，委員會期望能夠將義診計劃陸續推廣至各區喎。