「最愛餐湯同餐包」 熟客送別祖凡尼

【明報專訊】1975年開業、有40年歷史嘅元朗祖凡尼意大利餐廳噚日結業，Emily下午兩點半去到，一入門口伙計就話「家得番兩樣嘢食，一係荷包飯、一係天使麵」，之後嚟嘅客人更只能食閉門羹。餐廳內座無虛席，陰暗嘅燈光好似返咗去1980年代咁。席上唔少係上咗年紀嘅客人，有一開業就幫襯嘅熟客話最鍾意祖凡尼嘅餐湯同餐包，好唔捨得呢個味道。


老闆娘暫無再開店打算

唔少客人噚日朝早先知道祖凡尼結業，紛紛打電話去舖頭問個究竟。餐廳電話響不停，老闆娘葉太接起電話：「喂，祖凡尼，對唔住啊，我哋做到兩點半，今晚唔開喇，多謝你，拜拜。」食客都話唔捨得，因為喺度長大，得呢度先搵到兒時味道；亦有食客支持祖凡尼結業嘅決定，「喺最光輝嘅時候結業就最開心！」


網上有傳話祖凡尼因為業主加租所以結業，原來業主以前係祖凡尼股東之一，但家已拆伙。Emily問老闆娘結業係咪同加租有關，葉太都唔願多講，只嘆「冇辦法啦」，暫時冇打算喺第二度再開店咯。