新聞類別
副刊
詳情#
【明報專訊】香港電台節目《城市論壇》喺暑假後重新開壇，由被喻為「港台男神」嘅蘇敬恒，接替即將退休嘅謝志峰主持節目。蘇敬恒噚日第一日掌壇，新任廣播處長梁家榮（榮總）都去監場，仲大讚男神表現有110分。不過，嘉賓之一嘅民主黨主席劉慧卿就喺節目期間，口快快叫咗蘇敬恒做「傻仔」而鬧出小風波，卿姐事後即時向蘇敬恒道歉，話自己不時都會稱呼啲黨內乳鴿「細佬、傻豬、傻仔」，「其實我呢個口頭禪真係要改」。
蘇敬恒第一次主持《城市論壇》，Emily喺現場都聽到有觀眾話佢對住啲「維園阿伯」時唔夠惡。蘇敬恒節目後好虛心向記者行家請教自己表現如何、有乜嘢可以改善。蘇敬恒話，可能自己同嘉賓坐得近，都可以清楚聽到嘉賓發言，唔覺「維園阿伯」同觀眾好嘈，「今日大家都係守秩序」。
首主持城市論壇 被批「唔夠惡」
節目監製謝志峰亦讚新主持表現「好正」、「比想中好，喜出望外」，亦肯定佢唔會被人「恰」。至於「微服出巡」嘅榮總都大讚蘇敬恒表現有「110 分」，而之前教書不時畀學生0分嘅榮總，自嘲話「你知我畀分向來都低」。
節目期間，卿姐口快快講香港係「中華民國一部分」，蘇敬恒聽到就請卿姐澄清係講緊「中華人民共和國」，卿姐話「中華人民共和國啦，傻仔，我識分㗎」。卿姐事後知道衰咗，公開向蘇敬恒道歉。
出席論壇嘅民建聯副主席周浩鼎都幫卿姐講好話，話卿姐成日以「傻仔」做口頭禪，並無惡意，因為佢都係「受害者」，話佢以前同卿姐吹水時，卿姐都叫佢做「傻仔」，但佢覺得好親切喎！
回應 (0)
