政助陳岳鵬學拯溺考銅章

【明報專訊】政改投票完結後，好多負責政改工作嘅官員終於可以趁暑假唞吓，政制及內地事務局政治助理陳岳鵬（Ronald）喺暑假期間，就去咗學拯溺，咁咪可以兼職做救生員？Ronald話仲未可以，因為佢只係去咗考銅章，考試及格嘅話都只可以做「施救員」，即係幫手做人工呼吸。


政制及內地事務局長譚志源7月時講過，20個月嘅政改工作令佢重咗15磅，體重已達199磅，Ronald反而無咩點肥，身形keep得唔錯。Ronald透露一直都有做運動，仲話今個暑假去學拯溺，一星期至少學3堂，逢星期一、三、五放工後去上堂，有時星期六都會去，政改後嘅暑假過得好充實。


Ronald一直都好鍾意游水，參加過第三屆維港渡海泳，游畢全程，唔知Ronald趕唔趕得切喺下屆維港渡海泳前考埋拯溺資格，到時或者可以兼職幫手做救生員呢。