茂波談抗日史：外籍兵壯烈犧牲

【明報專訊】上周四北京搞大閱兵表揚抗日人民，其實有唔少外國人喺二戰時為香港捐軀。發展局長陳茂波噚日寫網誌，介紹香港有唔少戰時遺址，當中提及外籍士兵曾死守港島、半營守軍壯烈犧牲嘅事迹，而當年嘅浴血戰場黃泥涌峽磚屋同碉堡陣地，今日已被評為二級歷史建築。


介紹港戰時遺址

佢話，1941年12月8日，日軍開始侵略香港，12月18日，日軍集結軍力登陸北角、太古同鰂魚涌，與守軍發生激烈戰鬥，其中最慘烈嘅一場就係灣仔黃泥涌峽嘅攻防戰，而當年守衛黃泥涌峽嘅「西旅指揮總部」200多名守軍，主要由加拿大溫尼伯近衛營組成，佢哋當時嚟香港只係數星期，缺乏裝備和支援，跟日軍惡戰16小時後最終不敵，逾半守軍壯烈犧牲。


香港喺1941年聖誕節投降後，部分被俘嘅守軍同平民被關押到赤柱、深水埗和亞皆老街等地嘅集中營，而好多人都知，赤柱嘅拘留營就喺現時嘅聖士提反書院。陳茂波話，同大家重溫歷史，唔係要延續民族仇恨，而係希望銘記歷史，珍惜得來不易嘅和平喎。