賀港足守和 財爺籲球迷有風度

【明報專訊】香港足球隊上周四奮戰守和中國隊，呢件事到今日都仲係球迷話題，而財爺噚日亦喺網誌讚港隊，又話門將葉鴻輝嘅神勇表現，不負「英雄輝」之名，「我要祝賀各球員和教練團的努力和賽前的部署取得成功」。


不過，財爺都語帶雙關，提醒香港球迷，話聽晚（周二）港隊旺角場主場迎戰強隊卡塔爾，呼籲大家「一同向世界展示我們香港人優秀的質素和風格」。財爺咁講，唔知係咪因為之前有港隊球迷喺港隊比賽奏國歌時喝倒彩呢。


講開觀眾質素，財爺話早排去捧拳手曹星如（Rex）場，大讚現場觀眾非常投入之餘，由始至終表現克制，無爆粗口或講挑釁說話。財爺早前已喺facebook大讚Rex好勁，有網民留言挑機，叫習武嘅財爺用洪拳同Rex嘅西洋拳打一場，財爺就話咁即係「虐老」。佢話自己40年前參加過自由搏擊比賽，身上仍有當年參賽時受傷嘅疤痕，但如果家叫佢同Rex打比試，恐怕捱Rex一拳都幾大鑊！