新聞類別
財經
詳情#
【明報專訊】股神訪華各方關注，除咗六四血腥屠城嘅21個被通緝學運領袖之一嘅李錄，有得返屋企外，令人意外嘅仲包括股神力撐嘅比亞迪（1211）。講起股神，本地三、四線股一樣有好多「股神」，其中一個肯定係中科礦業（0985）兼國際資源（1051）主席趙渡。
獲得包括彤叔、大劉等等城中富豪瞓身力撐嘅趙主席，上晝喺股東會亮一亮相，旗下2隻股仔下晝即時開車，單係中科礦業已經飈升8個巴仙，現一現身股仔市值即時多咗3.7億。
身兼中科礦業主席嘅趙渡上晝11點出嚟股東會講解中科礦業喺澳洲嘅「Lady Annie」同埋喺秘魯嘅「Mina Justa」銅礦嘅發展後，中科礦業股價下晝即刻開車，由原來開市時既0.191元，飈升到最高嘅0.205元，最多升過8.5%，收市都升7.94%，報0.204元，上返一眾富豪0.2元嘅接貨價，市值就咁漲咗4億元。另一隻國際資源更加由跌變升，收市升3.92%，報0.53元。
趙渡話，中科礦業手頭現金雖然只有4.8億美元，而單係秘魯礦未來3年就要投資5.25億美元，不過澳洲嘅礦明年就可以產礦，並且有資金回籠，所以單係呢2個礦就有足夠資金，2012年仲會有錢賺
回應 (0)
