有話說﹕下午班非洪水猛獸

【明報專訊】以為幼稚園面試結束，做父母嘅可以鬆一口氣，原來呢場仗仲未打完。唔少學校都喺呢一兩個月公布取錄結果，家長們自然又有好多「讓我歡喜讓我憂」嘅感受。


Mama有朋友嘅仔女，有人考十間統統唔收，亦有人係全部學校都收晒。呢兩類家長其實都冇乜嘢煩，全部唔收嗰啲一係搵間街坊學校讀住先，一係等接近開學時間有人放位再去叩門；全部收晒嗰啲更加係是但揀一間就得。淨番最愁嗰班父母，就係收到嗰啲所謂「雞肋」offer。好似媽媽A話有幼稚園收咗阿囡，點知係下午班，但阿女仲要瞓晏覺，好擔心佢唔適應；媽媽B又話囝囝讀緊學前班嗰間學校可以直升K1，但佢又收到超級名校嘅下午班offer喎，到底值唔值得去讀呢？


對Mama嚟講，下午班並唔係咩洪水猛獸，好處仲幾多添！例如小朋友即使玩夜咗，第二日又可以瞓晏啲；撞正家冬天，諗諗吓，讀上午班朝早凍冰冰要抄個仔起身返學就夠辛苦啦！不過Mama都知朋友們對下午班仲有好多疑惑，所以同香港基督教服務處Pario教育服務的服務主任廖李耀群傾過。


循序漸進調校孩子作息時間

廖太話，值唔值得去讀一間學校係好個人嘅考慮，但如果小朋友冇其他學校收而又夠入學年齡，或者取錄佢嘅係一間父母好心儀嘅名校，讀下午班又何妨一試呢！佢仲話，小朋友返學當然要有足夠精神，所以家長最緊要係循序漸進咁為小朋友調校番作息時間。「例如讓他們早上7時起牀，玩到10時多便來一個小睡，起來後吃飯上學；晚上放學回家一會便吃晚飯，7時多便睡覺。這樣做是把他們整個作息時間提早。當然家長也要配合，如早點吃晚飯、晚上看電視聲浪不要太大等，讓孩子慢慢適應。」


廖太仲話小朋友唔係一朝一夕習慣得到，至少要一至兩個星期去適應，如果有心畀小朋友讀下午班，大家真係要畀啲心機去安排一下啦。